Su cranovalli in bidda mia

(Cruguxionis de mendua)

De Simonetta

In Sini su tempus de cranovalli initziada apustis de sa Pasca de is Gurreis  e finiat  sa dii inantis de su Mercuris de Cinixu.

Fiat una chida nodida, de divertimentu mannu po mannus e pitius inantis de su tempus de carèsima.

Is ultimas diis si tzerriant “su giobia agò”, “su dominigu e su martis de Agò”.

Giai in donnia familia si fadiant is tzipuas o is cruguxionis de mendua o de arrascotu.

Sa “maschera” si tzerriat  “sa Carota” e totus is omini prus brullanus si bistiant a femia e fudi un prexiu mannu po totus.

Sa cambarada de is mascheras fadiat su ingiriu de sa bidda, potanta una crocoriga prena de biu, po cumbidai a totus, e candu si sbuidada si frimanta mei is domus po dda torrai a preni.

Cancunu si imbriagada puru, ma in cussa diis fudi totu cumpodessiu.

Cancuna borta potanta in giru un arau tirau da dus omis, cund’unu chi fadiat finta de semiai su trigu.

Si fadiat unu mustaioni de arroba becia chi si tzerriat “Su Re de Cranovalli”. A custu mustaioi ddi fadiant unu processu, chi finiat cun sa cundanna a morti e ddu  abruxianta  in sa pratza de Crexia.

Sa mamma de Cranovalli  cantada is atitus, prangendi a corroxiu po sa cundanna de su fillu. Apustis de su processu, giai sempiri ci fiat unu sonadori strangiu chi sonat su sonettu e totus podiant baddai in pratza de Crexia.

Fiat unu spassiu mannu e una diì diversa da totus is atras, un atobiu de genti chi bessiat sceti in cussa diis.