Ci scrive Amos: “Agoa de l’imprenditore prevalente, labai prontu il politico autonomista prevalente”. Ddu connosceis?

L’identikit dell’imprenditore prevalente tracciato da Gianluca Floris sta riscuotendo un enorme successo. Lo schema si può riproporre in tanti ambiti, e bene ha fatto l’amico Amos Cardia a stilare i 18 punti nei quali è possibile riconoscere “il politico autonomista prevalente”. Buona lettura!

***

“Imprenditore prevalente” e “Politico autonomista prevalente” funt duus chichinus su prus de is bortas amigus, candu no s’agatant fradis in sa pròpiu famìllia puru. A bortas, “in casi particolarmente sfortunati”, cumenti iat a nai su dotori, funt sa pròpiu persona e totu. Po cussu imoi ddu connosceus, “il politico autonomista prevalente”, ca est fàtzili meda, bastat a biri, cumenti iat a sighiri a nai su dotori, “se soddisfa la maggior parte di queste condizioni”:

1 – Candu intrais in su partidu suu si preguntat de chini seis amigus, no ita seis bonus a fai.

2 – Candu depit detzidiri una cosa, narat “Già ci penso” e no detzidit mai.

3 – Candu depit fai una telefonada narat “Già lo chiamo” e no tzèrriat mai.

4 – Candu depint fai una scuadra scioberat sa genti “per rispettare gli equilibri” e no po su chi est bona a fai.

5 – Narat sempri “l’Autonomia”, cumenti chi “l’Autonomia” no dda tenèssimus giai.

6 – Candu ddu chistionais in sardu narat cumenti ddu chistionais (segundu issu, chi no ndi scit) e no s’arrespundit po su chi eis nau.

7 – Narat “E’ importante l’inglese” ma issu no ddu cumprendit e no est bonu a ddu chistionai ni a ddu scriri.

8 – Candu depit fai cosa narat “Bisogna fare” o “Bisognerebbe fare”, ma no narat mai ca ddu depit fai issu, candu e cumenti.

9 – Candu ddu chistionais in sardu narat “Io il sardo lo parlo in paese”.

10 – Candu chistionais de natzionis narat “Bisogna fare come a Barcellona”, ma issu fait cumenti in Madrid.

11 – Candu ndi scieis prus de issu, chi no nci bolit meda, si nci bogat ca sa genti dd’iat a podi biri.

12 – Candu ddi depeis nai tres cosas, ma tres diaderus, narat “Vieni da me, facciamo una riunione”, cumenti chi custu no siat a fuliai tempus e dinai.

13 – Narat “E’ importante l’informatica”, ma no cumprendit sa diferèntzia intru de un’email e unu situ.

14 – Po is festas polìticas fait chistionis mannas po Zuanne Maria Angioy o po Antoni Gramsci, no pensendi ca chi Angioy o Gramsci essint cumandau, sa genti cumenti a issu mancu s’iat a agatai.

15 – Segundu s’abisòngiu narat de essi autonomista, federalista e indipendentista, mancai siant tres cosas diferentis e no potzant andai imparis.

16 – Candu seis traballadoris autònomus, si narat “Vedrai che anche tu prima o poi troverai un lavoro vero”, chi po issu bolit nai traballu dipendenti, mancai in d-un’Enti chi no serbit, a no fai nudda de a mengianu a merì.

17 – Narat “Che già si alza di nuovo il vento”, intamis de fai polìtica de manera sèria.

18 – Narat “Bisogna lasciare spazio ai giovani”, ma issu medas bortas est bèciu e abarrat sempri cravau inguni.

Amos Cardia